ନୂଆଦିଲ୍ଲୀ : କେନ୍ଦ୍ର ସଂସଦୀୟ ବ୍ୟାପାର ମନ୍ତ୍ରୀ କିରଣ ରିଜିଜୁ ଆଜି ଲୋକସଭାରେ ୧୯୯୫ ୱକଫ୍ ଆଇନରେ ସଂଶୋଧନ ଆଣିବା ଉଦ୍ଦେଶ୍ୟରେ ୱକଫ୍ ସଂଶୋଧନ ବିଲ୍ ୨୦୨୪ ଉପସ୍ଥାପନ କରିଛନ୍ତି। ୱକଫ୍ ବିଲ୍ ଉପରେ ଗୃହରେ ଆଲୋଚନା ଜାରି ରହିଛି। ଏହି ବିଲ୍ ଉପରେ ୮ ଘଣ୍ଟିଆ ଆଲୋଚନା ହେବାର କାର୍ଯ୍ୟକ୍ରମ ରହିଛି। ଏଥିପାଇଁ ଭାରତୀୟ ଜନତା ପାର୍ଟି (ବିଜେପି) ଏବଂ କଂଗ୍ରେସ ସେମାନଙ୍କ ସାଂସଦମାନଙ୍କୁ ଗୃହରେ ସେମାନଙ୍କ ଉପସ୍ଥିତି ସୁନିଶ୍ଚିତ କରିବାକୁ କହିଛନ୍ତି।
କେନ୍ଦ୍ର ସଂଖ୍ୟାଲଘୁ ବ୍ୟାପାର ମନ୍ତ୍ରୀ କିରଣ ରିଜିଜୁ ବୁଧବାର ଲୋକସଭାରେ ଏକ ଯୁଗ୍ମ ସଂସଦୀୟ କମିଟି ଦ୍ୱାରା ପ୍ରସ୍ତାବିତ ୱକଫ୍ (ସଂଶୋଧନ) ବିଲ୍, ୨୦୨୪କୁ ବିଚାର ଓ ପାରିତ ପାଇଁ ଉପସ୍ଥାପନ କରିଛନ୍ତି। ଏହି ବିଲ୍ରେ ଓ୍ଵକଫ୍ ସମ୍ପତ୍ତିର ପରିଚାଳନାରେ ଉନ୍ନତି ଆଣିବା, ପ୍ରଯୁକ୍ତି ଭିତ୍ତିକ ପରିଚାଳନା ପ୍ରଚଳନ, ଜଟିଳତା ଦୂର କରିବା ଏବଂ ସ୍ୱଚ୍ଛତା ସୁନିଶ୍ଚିତ କରିବାକୁ ଲକ୍ଷ୍ୟ ରଖାଯାଇଛି।
ଏହି ବିଲ୍ ଉପସ୍ଥାପନ କରି ଶ୍ରୀ ରିଜିଜୁ କହିଛନ୍ତି ଯେ ଭାରତର ଗଣତାନ୍ତ୍ରିକ ଇତିହାସରେ ସଂସଦୀୟ କମିଟି (ଜେପିସି)ର ପରାମର୍ଶ ପ୍ରକ୍ରିୟା ହେଉଛି ସର୍ବବୃହତ୍ ପ୍ରକ୍ରିୟା। ଫିଜିକାଲ ଓ ଅନଲାଇନ ଫର୍ମାଟ ଜରିଆରେ ଜେପିସିକୁ ୯୭.୨୭ ଲକ୍ଷରୁ ଅଧିକ ପିଟିସନ, ସ୍ମାରକପତ୍ର ମିଳିଥିଲା ଏବଂ ଜେପିସି ଏହାର ରିପୋର୍ଟ ଚୂଡ଼ାନ୍ତ କରିବା ପୂର୍ବରୁ ସେଗୁଡ଼ିକ ମଧ୍ୟରୁ ପ୍ରତ୍ୟେକକୁ ଅନୁଧ୍ୟାନ କରିଛି ବୋଲି ସେ କହିଛନ୍ତି। ମନ୍ତ୍ରୀ କହିଛନ୍ତି ଯେ ୨୫ଟି ରାଜ୍ୟ ଏବଂ କେନ୍ଦ୍ର ଶାସିତ ଅଞ୍ଚଳର ୱକଫ ବୋର୍ଡ ବ୍ୟତୀତ ୨୮୪ଟି ପ୍ରତିନିଧି ଦଳ ଏହି ବିଲ୍ ଉପରେ ସେମାନଙ୍କର ମତାମତ ପ୍ରଦାନ କରିଛନ୍ତି। ଆଇନଜୀବୀ, ସେବାୟତ ସଂଗଠନ, ଶିକ୍ଷାବିତ୍ ଓ ଧାର୍ମିକ ନେତାମାନେ ମଧ୍ୟ ନିଜର ମତାମତ ରଖିଥିବା ସେ କହିଛନ୍ତି।
