ଭୁବନେଶ୍ୱର : ଶେଷ ହେଲା ସପ୍ତଦଶ ବିଧାନସଭା ଅଧିବେଶନ । ଅନିର୍ଦ୍ଧିଷ୍ଟ କାଳ ପାଇଁ ଗୃହକୁ ମୂଲତବୀ ଘୋଷଣା କଲେ ବାଚସ୍ପତି ସୁରମା ପାଢ଼ୀ । ଆଗକୁ କୌଣସି ଗୁରୁତ୍ୱପୂର୍ଣ୍ଣ କାର୍ଯ୍ୟକ୍ରମ ନଥିବାରୁ ଅନିର୍ଦ୍ଦିଷ୍ଟ କାଳ ପାଇଁ ମୁଲତବୀ ଘୋଷଣା ଲାଗି ପ୍ରସ୍ତାବ ଆଣିଥିଲେ ସରକାରୀ ଦଳ ମୁଖ୍ୟ ସଚେତକ। ଯାହାକୁ ସମର୍ଥନ କରିଥିଲେ ଏକାଧିକ ବିଧାୟକ। ପରେ ବାଚସ୍ପତି ଗୃହକୁ ଅନିର୍ଦ୍ଦିଷ୍ଟ କାଳ ପାଇଁ ମୁଲତବି କରିଛନ୍ତି ବାଚସ୍ପତି ସୁରମା ପାଢୀ।
ଦୀର୍ଘ ଦଶନ୍ଧିର ରେକର୍ଡ ଭାଙ୍ଗିଥିଲା ବିଧାନସଭାର ଏହି ବଜେଟ ଅଧିବେଶନ । ବୁଧବାର ସାରାରାତି ଚାଲିଥିଲା ଗୃହ କାର୍ଯ୍ୟ । ଏହି ଅବସରରେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଆଣିଥିଲେ ୨୦୨୫-୨୬ ଆର୍ଥିକ ବର୍ଷର ପୂର୍ଣ୍ଣାଙ୍ଗ ବଜେଟ । ରାଜ୍ୟପାଳ ଗୃହକୁ ସମ୍ବୋଧନ କରିଥିଲେ। ଦୁଇଟି ବିଭାଗର ଆଇନ ପ୍ରଣୟନ ବିଲ ଗୃହରେ ପାରିତ ହୋଇଛି । ବିଶ୍ଵ ବିଦ୍ୟାଳୟ ସଂଶୋଧନ ବିଲ୍ ୨୦୨୪ ଓ ଓଡ଼ିଶା ରାଜ୍ୟ ରାଜପଥ ପ୍ରାଧିକରଣ ୨୦୨୫ ବିଲ ପାରିତ ହୋଇଛି। ଚଳିତ ଅଧିବେଶନରେ ୨୫ଟି କାର୍ଯ୍ୟ ଦିବସ ଅନୁଷ୍ଠିତ ହୋଇଛି। ରୋଚକ ଥିଲା ଏହି ଅଧିବେଶନ। ଗୃହରେ ଜୋରଦାର ପ୍ରତିବାଦ ପାଇଁ ଗୃହରୁ ନିଲମ୍ବନ ହୋଇଥିଲେ ସମସ୍ତ କଂଗ୍ରେସ ବିଧାୟକ।
ବିଧାନସଭା ସମାପ୍ତ ପୂର୍ବରୁ ଗୃହରେ ପାରିତ ହୋଇଯାଇଛି ରାଜ୍ୟ ରାଜପଥ ପ୍ରାଧିକରଣ ବିଲ ୨୦୨୫ । ସରକାର ସମଗ୍ର ରାଜ୍ୟରେ ୭୫ ହଜାର କିଲୋମିଟର ସଡ଼କକୁ ବିଶ୍ୱସ୍ତରୀୟ ରୋଡ଼ ନେଟୱାର୍କ ଭାବେ ବିକଶିତ କରିବା ପାଇଁ ପରିକଳ୍ପନା କରିଛନ୍ତି। ରାଜ୍ୟର ରୋଡ଼ ନେଟୱର୍କର ବିକାଶକୁ ତ୍ବରାନ୍ବିତ କରିବା ପାଇଁ ଜମି ଅଧିଗ୍ରହଣ, ପୁନର୍ବାସ ଓ ଥଇଥାନ, ପରିବେଶ ଓ ଜଙ୍ଗଲ ଜମି ମଞ୍ଜୁରୀ, କେବୁଲ ଓ ପାଇପ୍ ଲାଇନ୍ ସ୍ଥାନାନ୍ତରଣ, ଟ୍ରାଫିକ ନିୟନ୍ତ୍ରଣ, ସଡ଼କ ସୁରକ୍ଷା, ଜବରଦଖଲ ନିୟନ୍ତ୍ରଣ ଏବଂ ରାଜପଥର ସଠିକ୍ ପରିଚାଳନା ଆବଶ୍ୟକ। ରାଜ୍ୟରେ ଦକ୍ଷ ଏବଂ ସୁରକ୍ଷିତ ସଡ଼କ ଭିଭିଭୂମିର ପ୍ରଭାବୀ ପରିଚାଳନା, ଯୋଜନା, ବିକାଶ ଓ ରକ୍ଷଣାବେକ୍ଷଣ ନିମନ୍ତେ ଓଡ଼ିଶା ରାଜ୍ୟ ରାଜପଥ ପ୍ରାଧିକରଣ ନାମରେ ଏକ ସ୍ବୟଂଶାସିତ ସଂସ୍ଥା ଗଠନ କରିବାକୁ ସମୀଚିତ ବୋଲି ବିବେଚନା କରାଯାଉଛି।
