ମୟୁରଭଞ୍ଜ : ଷଷ୍ଠ ଶ୍ରେଣୀ ଛାତ୍ରଙ୍କୁ ଅକଥନୀୟ ନିର୍ଯ୍ୟାତନା । ବ୍ଲେଡରେ ହାତ କାଟି କ୍ଷତ ସ୍ଥାନରେ ଲୁଣ ମାରିବା ସହ ବନ୍ଦ କଠୋରୀରେ ନିସ୍ତୁକ ମାଡ଼ ମାରିଛନ୍ତି ନବମ ଶ୍ରେଣୀ ଛାତ୍ର । ଏଭଳି ବର୍ବର କାଣ୍ଡ ଘଟିଛି ମୟୂରଭଞ୍ଜ ଜିଲ୍ଳା ଖୁଣ୍ଟା ଥାନା ବାସିପିଠାରେ ଥିବା ଏକ ଆବାସିକ ସ୍କୁଲରେ । ସ୍କୁଲ ହଷ୍ଟେଲରେ ରହୁଥିବା ଜଣେ ଷଷ୍ଠ ଶ୍ରେଣୀ ଛାତ୍ରଙ୍କ ବୟାନ ପରେ ଏହି ସଙ୍ଗୀନ ଘଟଣା ପଦାକୁ ଆସିଛି । ବାରିପଦା ଭୁଗୁଡାକଟା ଅଞ୍ଚଳର ଷଷ୍ଠ ଶ୍ରେଣୀର ଜଣେ ଛାତ୍ରଙ୍କୁ ହଷ୍ଟେଲରେ ରହୁଥିବା ନବମ ଶ୍ରେଣୀ ଛାତ୍ରମାନେ ଦେଇଛନ୍ତି ଏଭଳି ନିର୍ଯାତନା ।
ସୂଚନା ଅନୁସାରେ ନବମ ଶ୍ରେଣୀ ଛାତ୍ରମାନେ ବସି ହଷ୍ଟେଲରେ ମଦ ପିଉଥିବାବେଳେ ଷଷ୍ଠ ଶ୍ରେଣୀ ଛାତ୍ର ଜଣକ ଦେଖିଥିଲେ । ଏ ନେଇ ପ୍ରଧାନଶିକ୍ଷକଙ୍କୁ ଜଣାଇଥିଲେ । ଏଥିରେ ନବମ ଶ୍ରେଣୀ ଛାତ୍ର ମାନେ ଉତ୍ୟକ୍ତ ହୋଇ ପରଦିନ ଷଷ୍ଠ ଶ୍ରେଣୀ ଛାତ୍ରଟିକୁ ଦେଇଥିଲେ ଅକଥନୀୟ ନିର୍ଯ୍ୟାତନା । ପିଲାଟିକୁ ଏକ ବନ୍ଦ କୋଠରୀରେ ଭର୍ତି କରି ନିସ୍ତୁକ ମାଡ଼ ମାରିବା ସହିତ ତା’ହାତକୁ ବ୍ଲେଡରେ କାଟି କ୍ଷତ ସ୍ଥାନରେ ଲୁଣ ମାରି ଥିଲେ । କେବଳ ସେତିକି ନୁହେଁ ସୀମା ସରହଦ ଡେଇଁ ଛାତ୍ରମାନେ ଛୁରୀ ଦେଖାଇ ତାଙ୍କୁ ଜୀବନରୁ ମାରିଦେବାକୁ ଧମକ ମଧ୍ୟ ଦେଇଥିଲେ । ଏହାପରେ ପିଲାଟି ଛୁଟିରେ ଘରକୁ ଯାଇ ଆଉ ହଷ୍ଟେଲ ଫେରିବାକୁ ଅମଙ୍ଗ ହୋଇଥିଲା । ତେବେ ପରିବାର ଲୋକେ ପଚାରିବାରୁ ପିଲାଟି ସବୁ କଥା କହିଥିଲା । ଘଟଣା ସମ୍ପର୍କରେ ପରିବାର ଲୋକେ ଖୁଣ୍ଟା ଥାନାରେ ଲିଖିତ ଅଭିଯୋଗ କରିଛନ୍ତି । ଅଭିଯୋଗକୁ ଆଧାର କରି ପୋଲିସ ତଦନ୍ତ ଆରମ୍ଭ କରିଛି ।
