ନୂଆଦିଲ୍ଲୀ : ଶ୍ରୀଲଙ୍କା ଗସ୍ତରେ ଅଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ । ଏହି ଅବସରରେ ଶନିବାର ତାଙ୍କୁ ଶ୍ରୀଲଙ୍କା ପକ୍ଷରୁ ‘ମିତ୍ର ବିଭୂଷଣ’ ସମ୍ମାନ ପ୍ରଦାନ କରାଯାଇଛି। ଶ୍ରୀଲଙ୍କା ରାଷ୍ଟ୍ରପତି ଅନୁରା ଦିସାନାୟକେ ପ୍ରଧାନମନ୍ତ୍ରୀ ମୋଦୀଙ୍କୁ ଏହି ସମ୍ମାନରେ ସମ୍ମାନିତ କରିଛନ୍ତି । ଶ୍ରୀଲଙ୍କା ସରକାର ଦୁଇ ଦେଶର ଦ୍ୱିପାକ୍ଷିକ ସଂପର୍କକୁ ଆହୁରି ନିବିଡ କରିବା ଓ ପରସ୍ପର ସାଂସ୍କୃତିକ ସହଭାଗିତାକୁ ଆଗକୁ ବଢାଇରେ ଉଲ୍ଲେଖନୀୟ ଭୂମିିକା ଗ୍ରହଣ କରିଥିବାରୁ ପିଏମ ମୋଦୀଙ୍କୁ ଏହି ସମ୍ମାନରେ ସମ୍ମାନିତ କରିଛି । ଏହାକୁ ମିଶାଇ ଏ ପର୍ଯ୍ୟନ୍ତ ପ୍ରଧାନମନ୍ତ୍ରୀ ମୋଦୀଙ୍କୁ ବିଦେଶରୁ ୨୨ ଅନ୍ତର୍ଜାତୀୟ ସମ୍ମାନ ମିଳିଛି ।
ଏହି ମେଡାଲରେ ଥିବା ଧର୍ମ ଚକ୍ର ବୌଦ୍ଧ ଧର୍ମର ଇତିହାସକୁ ଇଙ୍ଗିତ କରୁଛି । ପ୍ରଧାନମନ୍ତ୍ରୀ କଲୋମ୍ବୋଠାରେ ଶ୍ରୀଲଙ୍କା ରାଷ୍ଟ୍ରପତି ଦିସାନାୟକେଙ୍କ ସହିତ ଏକ ଯୁଗ୍ମ ସାମ୍ବାଦିକ ସମ୍ମିଳନୀରେ ସମ୍ବୋଧିତ କରିଥିଲେ। ସେ କହିଥିଲେ, ଆଜି ରାଷ୍ଟ୍ରପତି ଦିସାନାୟକେଙ୍କ ଦ୍ବାରା ଶ୍ରୀଲଙ୍କା ମିତ୍ର ବିଭୂଷଣରେ ସମ୍ମାନିତ ହେବା ତାଙ୍କ ପାଇଁ ଗୌରବର ବିଷୟ। ଏହି ସମ୍ମାନ କେବଳ ମୋର ସମ୍ମାନ ନୁହେଁ, ବରଂ ୧୪୦ କୋଟି ଭାରତୀୟଙ୍କ ପାଇଁ ଗର୍ବର ବିଷୟ।
ଏହି ସମ୍ମାନ ଏଥିପାଇଁ ଗୁରୁତ୍ୱ ବହନ କରୁଛି କାରଣ ଗତ କିଛି ବର୍ଷ ହେବ ଶ୍ରୀଲଙ୍କା ଚୀନ ଆଡେ ଢଳିଥିବା ଦେଖିବାକୁ ମିଳିଛି । ଶ୍ରୀଲଙ୍କାରେ ନିଜର ସ୍ଥିତି ମଜଭୁତ କରିବା ପାଇଁ ଚୀନ ଅନେକ ବର୍ଷରୁ ଉଦ୍ୟମ ଚଳାଇ ଆସିଛି । ଅନ୍ୟପଟେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଶ୍ରୀଲଙ୍କା ଗସ୍ତ ଓ ପୁଣି ତାଙ୍କୁ ସମ୍ମାନିତ କରାଯିବା ଏହାର ସଙ୍କେତ ଦେଉଛି ଯେ, ଶ୍ରୀଲଙ୍କା ନିଜର ପୁରୁଣା ନୀତିରେ ଭାରତକୁ ଅଧିକ ଗୁରୁତ୍ୱ ଦେବାକୁ ଚାହୁଁଛି । ଏହିପରି ଶ୍ରୀଲଙ୍କା ଚୀନକୁ ବଡ ସନ୍ଦେଶ ଦେବାକୁ ଚେଷ୍ଟା କରିଛି ।
ଶ୍ରୀଲଙ୍କାର ରାଷ୍ଟ୍ରପତି ଅନୁରା କୁମାର ଦିସାନାୟକେ କହିଛନ୍ତି ଭାରତ ଓ ଶ୍ରୀଲଙ୍କା ସମ୍ବନ୍ଧ ସର୍ବଦା ନିବିଡ ରହି ଆସିଛି । ଆମ ମଧ୍ୟରେ ଧାର୍ମିକ ଓ ସାଂସ୍କୃତିକ ସମ୍ବନ୍ଧ ରହିଛି । ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏହି ସମ୍ମାନର ହକଦାର ।
