ପୁନେ : ପୁନେର ଶ୍ରୀଶିବଛତ୍ରପତି ସ୍ପୋର୍ଟ୍ସ କମ୍ପ୍ଲେକ୍ସରେ ଆୟୋଜିତ ଅଲ୍ଟିମେଟ ଖୋ ଖୋର ଫାଇନାଲରେ ବାଜି ମାରିଛି ଓଡ଼ିଶା ଜଗରନଟ୍ସ । ରବିବାର ଅନୁଷ୍ଠିତ ତୀବ୍ର ସଂଘର୍ଷପୂର୍ଣ୍ଣ ମୁକାବିଲାରେ ଓଡ଼ିଶା ଜଗରନଟ୍ସ ମାତ୍ର ୧ ପଏଣ୍ଟ (୪୬-୪୫) ବ୍ୟବଧାନରେ ତେଲଗୁ ଯୋଦ୍ଧାକୁ ଧରାଶାୟୀ କରି କୀର୍ତ୍ତିମାନ ରଚିଛି । ଦିନକ ଆଗରୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଓଡ଼ିଶା ଜଗରନଟ୍ସ ଖେଳାଳିଙ୍କ ସହ କଥା ହୋଇ ମନୋବଳ ବଢ଼ାଇଥିଲେ । ସବୁ ଖେଳାଳି ମୁଖ୍ୟମନ୍ତ୍ରୀଙ୍କୁ ଟ୍ରଫି ନେଇ ଭୁବନେଶ୍ୱର ଫେରିବେ ବୋଲି ପ୍ରତିଶ୍ରୁତି ଦେଇଥିଲେ । ସତକୁ ସତ ରବିବାର ଫାଇନାଲରେ ଓଡ଼ିଶା ଫାଇନାଲରେ ଓଡ଼ିଶା ଜଗରନଟ୍ସ ବାଜିମାତ କରିଛି । ପ୍ରଥମ ସଂସ୍କରଣର ବିଜେତା ହେବା ସହ ଟ୍ରଫି ହାତେଇଛି ଜଗରନଟ୍ସ ।
ଗତ ଶୁକ୍ରବାର ପ୍ରଥମ କ୍ୱାଲିଫାୟର ମ୍ୟାଚରେ ଓଡ଼ିଶା ଜଗରନଟ୍ସ ଗୁଜରାଟ ଜ୍ୟାଣ୍ଡସକୁ ୫୭-୪୩ ପଏଣ୍ଟରେ ପରାସ୍ତ କରି ଫାଇନାଲରେ ପ୍ରବେଶ କରିଥିଲା । ୬ ଦଳକୁ ନେଇ ଖେଳାଯାଇଥିବା ଏହି ପେସାଦାର ଖୋ ଖୋ ଲିଗ୍ର ଶେଷ ଦୁଇ ସ୍ଥାନରେ ମୁମ୍ବାଇ ଖଲାଡିଜ୍ ଓ ରାଜସ୍ଥାନ ୱାରିୟର୍ସ ରହିବା ସହ ବିଦାୟ ନେଇଥିଲେ ।
ମ୍ୟାଚର ଦ୍ୱିତୀୟ ହାପ୍ର ତୃତୀୟ ଟର୍ଣ୍ଣରେ ତେଲଗୁ ଯୋଦ୍ଧା ୨୧ ପଏଣ୍ଟ ଅର୍ଜନ କରି ୪୧-୨୭ରେ ଅଗ୍ରଣୀ ହାସଲ କରିଥିଲା । ସଚିନ ଭାର୍ଗୋ ଗୁରୁତ୍ୱପୂର୍ଣ୍ଣ ଦୁଇ ପଏଣ୍ଟ ହାସଲ କରି ଓଡ଼ିଶାକୁ ପଛରେ ପକାଇ ଦେଇଥିଲେ । ତୃତୀୟ ଟର୍ଣ୍ଣ ଶେଷ ହେବାକୁ ଆଉ ଦେଢ଼ ମିନିଟ୍ ବାକିଥିବା ବେଳେ ମ୍ୟାଚର ସ୍ଥିତି ୪୫-୪୩ରେ ପହଞ୍ଚି ଯାଇଥିଲା । ଚତୁର୍ଥ ଟର୍ଣ୍ଣରେ ମ୍ୟାଚର ମୋଡ଼ ବଦଳାଇଥିଲେ ଓଡ଼ିଶା ଖେଳାଳି ।
ବଲିଉଡ ଗାୟକ ମୋହିତ ଚୌହାନ ଫାଇନାଲ ମ୍ୟାଚ ଆରମ୍ଭ ହେବା ପୂର୍ବରୁ ଜାତୀୟ ସଂଗୀତଗାନ କରିଥିଲେ । ଲାୟନ୍ସ କ୍ରିୟୁ (୨୦୨୧ ବିଶ୍ୱ ହିପ୍ ହପ୍ ଡ୍ୟାନ୍ସ ଚାମ୍ପିଅନ୍ସିପ୍ ବ୍ରୋଞ୍ଜ ପଦକ ବିଜେତା) ପକ୍ଷରୁ ଉଚ୍ଚକୋଟୀର ନୃତ୍ୟ ପରିବେଷଣ କରାଯାଇଥିଲା । ଚାମ୍ପିଅନ୍ ଓଡ଼ିଶା ଜଗରନଟ୍ସ ଦଳ ଟ୍ରଫି ସହ ଏକ କୋଟି ଟଙ୍କାର ପୁରସ୍କାର ରାଶି ଗ୍ରହଣ କରିଛି । ଦ୍ୱିତୀୟ ସ୍ଥାନରେ ଥିବା ତେଲଗୁ ଯୋଦ୍ଧା ଦଳ ୫୦ ଲକ୍ଷ ଟଙ୍କା, ତୃତୀୟ ସ୍ଥାନରେ ଥିବା ଗୁଜରାଟଜ୍ୟାଣ୍ଟସ ୩୦ ଲକ୍ଷ ଟଙ୍କା ପୁରସ୍କାର ରାଶି ପାଇଛି ।
ଅଲ୍ଟିମେଟ ଖୋ ଖୋ ପ୍ରଥମ ସଂସ୍କରଣରେ ୬ଟି ଦଳ ଅଂଶଗ୍ରହଣ କରିଥିଲେ । ଏମାନେ ହେଲେ ଚେନ୍ନାଇ କୁଇକ୍ ଗନ୍ସ, ଗୁଜରାଟଜ୍ୟାଣ୍ଟସ୍, ମୁମ୍ବାଇ ଖିଲାଡିଜ୍, ଓଡ଼ିଶା ଜଗରନଟ୍ସ, ରାଜସ୍ଥାନ ୱାରିୟର୍ସ ଓ ତେଲଗୁ ଯୋଦ୍ଧାସ ।
ମୁଖ୍ୟମନ୍ତ୍ରୀଙ୍କ ଅଭିନନ୍ଦନ, ଏକ କୋଟି ଟଙ୍କା ପୁରସ୍କାର ଘୋଷଣା
ଅଲଫିମେଟ ଖୋ ଖୋ ପ୍ରଥମ ସଂସ୍କରଣ ଚାମ୍ପିଅନ୍ ଓଡ଼ିଶା ଜଗରନଟ୍ସକୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଅଭିନନ୍ଦନ ସହ ଜଣାଇବା ସହ ଏକ କୋଟି ଟଙ୍କାର ପୁରସ୍କାର ରାଶି ଘୋଷଣା କରିଛନ୍ତି । ସ୍ୱତନ୍ତ୍ର ସମ୍ବର୍ଦ୍ଧନା ଉସିବରେ ଖେଳାଳିଙ୍କୁ ସମ୍ମାନିତ କରାଯିବ ।
Comments are closed.